قلبي على وطني
قلبي على وطني
وي رشفه الفنجان
وبكل تحيه صبح
من حايط الجيران
لو ما انته ياحيرتي
ما كان كل ما كان
من غير ارض واهل
ما قيمه الانسان؟
بس يا خساره الاهل
من حط رحاله الجمل
وياك علو الجبل
ولارخص علك اجنبي
تتخضع وتنحني
قلبي على وطني
***
قلبي على وطني وي كل سحابه تفوت
وعن كل بطل ما بخل فوق التراب يموت
وعن كل دمع من يشع عالخد يقع بسكوت
وعن كل قمر لو ظهر
وبحزن روحي انتحر
والطير فوق الشجر
ينشد باعذب صوت
الماي من ينغلي
من لوعته يغني
آنه انكوي بطيبتي
وكل حي طلع مني
قلبي على وطني
اهواك يا وطني لو جنتك ناري
وانزفلك الدم شعر واهديلك اشعاري
كل يوم نقعد سوه واحكيلك سراري
تفقدني من ابتعد وتزورني بداري
وابكيلك ابلا دمع واشرحلك الجاري
معذور من سرني
معذور من لامني
قلبي على وطني
دمعتي ويسقيني كاس الندم
انطيته حلم العمر ونطاني جنه وهم
واني مثل هالبشر هم روح دم ولحم
وما ضعف حبي اله
ولا غيرت مسكني
قلبي على وطني
***
بالحرب شلتك نبض من ساتر لساتر
وشربتك بخوذتي من حبك الطاهر
تغفه على سبابتي ويبقى القلب ساهر
ومن ضاق بيك الوكت انطيتك اخواني
كل ما تذبل قمر تطلب قمر ثاني
لاجيت عزيتني ولا شاركت احزاني
اشكيك يا منيتي لوتشتكي مني؟؟
قلبي على وطني
قلبي على وطني
***
قلبي على وطني كل ما تدق صافره
وكل ما قذيفه غدر تنطلق من طائره
وعن كل طفل منذهل وعن نظرته الحايره
وكل قنبله لو اجت وبأرضك اتفجرت
اتفجر الحالتي وبكفوفك اتناثر
احزانه صوغتك وايامنه امكابر
وبس الحزن والالم
من شجرتك ينجني
قلبي على وطني
موضوع: قلبي على وطني ..... 
السبت ديسمبر 15, 2012 9:48 am