ديار حسين والطيبين ظلت موحشه اخلافه

ديار حسين والطيبين ظلت موحشه اخلافه
ـــــــــــــــــــــــ
طلع من المدينه حسين لارض الكوفه كاصدهه
اخذ كل الاهل وياه الحرم شدت مساندهه
اوتركو بالخيم الهم عليله المرض ظاهدهه
ورى الاضعان تون باحزان ظلت موحشه اخلافه
ـــــــــــــــــــــــ
صاحت بالاثر يحسين وحيده لاتخلوني
اشد الكم محاملكم وارعه الطفل اخذوني
اباريه ابنهار وليل ومهد تصبحله اعيوني
اخافن من يطول غياب ابدار الغربه تنسوني
اوتعمه العين بطول سنين ظلت موحشه اخلافه
ـــــــــــــــــــــــ
ماتدري المنايه اوياه تسير اوتحسب الانفاس
وحاطت بيه جيوش يزيد ويردونه يطخ الراس
نكرو كل عهد لحسين الغدر طينتهم من الساس
ذبحو اهله ونصاره هشمو هامة العباس
سهم بالعين كطعو جفين ظلت موحشه اخلافه
ـــــــــــــــــــــــ
ظل بس الطفل بيده طلبهم ماي يسكونه
كال الهم طفل عطشان اوليدي غركت عيونه
الطفل بيده ويحاجيهم اولن ابسهم يرمونه
عبدالله الرضيع اشجان ذنبه اوهم يذبحونه
صفن همين ذبح نحرين ظلت موحشه اخلافه
ـــــــــــــــــــــــ



العليله البكت تتناهم من ابوهه تنتظر مرسال
بكل ليله يجيهه الطيف وتتذكر ابوهه اشكال
اوديلج علي الاكبر لوعباس ابو الابطال
وتفز من الحلم لنهه وحيده انشده منهه البال
تظل بونين وبنارين ظلت موحشه اخلافه
ـــــــــــــــــــــــ
نار الفركه جتاله ونار العله ملتهبه
والعين ابمسه ومصباح على نفس الدرب تربه
درب السار بيهه حسين الدليل مسافر ابدربه
ولو فاض الحنين تصيح بسم الوالد اتندبه
الصبر ملنه وشمر منه ظلت موحشه اخلافه
ـــــــــــــــــــــــ
وهي بدار ابوهه اتون ابدمعهه ولن خبر تسمع
لفت عيلة علي الكرار حسين وعيلته ترجع
ركضت للدرب وبشوك الكلب كبل الجسم يطلع
لكت بس زينب وايتام وكلبه كطعه المطلع
عرف بحسين خان البين ظلت موحشه اخلافه
ـــــــــــــــــــــــ