.. يا يوم أشوف أعتابك ..

.. يا يوم أشوف أعتابك ..

يا يوم أشوف أعتابك - وأوگف حزين ببابك
وأرجع أزورك يا حيدر
طول عليه غيابك - مشتاگ أشم ترابك
وأرجع أزورك يا حيدر
آنه إلهويتك - لا تظن نسيتك

علي وهذا الإسم يسري بشرياني - نبع يل ما تمل شوگك رياحيني
عتب وياك عندي يراوح بعيني - يمن فرگاك كدر صفوة سنيني
أريد أحچي بصراحة وياك خليني - أخاف مكدرات الجو تنسيني
يا با الحسن ما تدري - صرت أشتريها بعمري
شوفة ضريحك يا حيدر
من الفرگة نافذ صبري - وظلت تعيش بفكري
شوفة ضريحك يا حيدر
بروحي إشتريتك - لا تظن نسيتك

عشت أعوام يمك يا ربيع الحي - ما أعوفك چنت مثل الجرف والمي
لو صرت بهجير أگصد إلك يا في - ولو ليل الوكت دلهم أشوفك ظي
غصب من جنتك طلعوني أهل الغي - وخلوني أظل لا ميت ولا حي
من جنتك حرموني - برجوة أمل خلوني
كل فكري يمك يا حيدر
عنك غصب بعدوني - أمشي وأدير عيوني
كل فكري يمك يا حيدر
عشت بثنيتك - لا تظن نسيتك

مو بيدي غصب عفتك يا بو الحسنين - وعنك رحت أتلفت وأدير العين
گلت هالفرگة بالميت شهر شهرين - وطالت يا علي لا سنة ولا سنتين
أناشد عالصبر ما أدري دربه منين - خذن ثلثين حيلي مخلفات البين
دنيايه نفرت عني - وحتى الصبر مل مني
مشتاگ أشوفك يا حيدر
أغفى بوسادة ظني - وأصحى على دمعي ووني
مشتاگ أشوفك يا حيدر
يا ما نخيتك - لا تظن نسيتك

البعد شيبني يا من فرگتك كلفة - وجرح شوگي غميج وما وگف نزفه
ليالي الظيم باگن بسمة الشفة - وسنيني إنگضت بالحسرة واللهفة
لچن بعده الأمل بالروح ما يخفه - وأحس روحي بعدها لهالوكت ترفه
من عيني ينزف موحي - وآنه بترافة روحي
أرسم خيالك يا حيدر
هالحبر دم جروحي - وصرت بصحيفة نوحي
أرسم خيالك يا حيدر
بروحي لگيتك - لا تظن نسيتك

بخيالك عايش من سنين وأتحسر - ولا أدري مصيري شلون يا حيدر
صرت ما أشعر بطعم البرد والحر - وإذا نسمة هوى تزاجمني أتكدر
جمر ظيمي بصميم حشاي يتوجر - وبعيني غدت عبراتي تتكسر
ما عندي غفوة بنومي - ولا صحوة تجلي همومي
حيرني بعدك يا حيدر
ما مش سعد بنجومي - ولا فرحة تسعد يومي
حيرني بعدك يا حيدر
ترحمني ريتك - لا تظن نسيتك

يا وهجة عشگ ناغت خلايا الدم - خلافك عمري ذرة وضايعة بمنجم
بغيرك شمل روحي ما بعد يلتم - يا بو الحسنين إنت الجرح والبلسم
يا يوم أوصلك وأكشف سحاب الهم - وأنفض يم ضريحك كل غبار الهم
يا يوم أصل يم گبرك - وأنصب مناحة بكترك
و أبچي لمصابك يا حيدر
يل ما صفى لك دهرك - أذكر مرارة صبرك
وابچي لمصابك يا حيدر
وأذكر رزيتك - لا تظن نسيتك

أتمنى مثل هاليوم چنت هناك - وأجدد يم ضريحك هالعهد وياك
وأنصب مأتم على مصابك وأنعاك - وأون ون الثكالة لگقدك وفرگاك
لكن ما نسيتك عايش بذكراك - وضميري من البعد يا با الحسن ناداك
بين الدمع والحسرة - أذكر لهيب الطبرة
يصعب مغيبك يا حيدر
من عيني تجري العبرة - وبين الجوانح جمرة
يصعب مغيبك يا حيدر
بالهم بچيتك - لا تظن نسيتك