لا تظن بعدك يظل مفتوح بابي
ولا تظن غيرك ادورلي حبيب
من رحت ماتت البسمه عل الشفايف
والحزن صادقني بعدك والنحيب
وما بقت بكليبي فرحه
وصرت عايش جني بالدنيا غريب
وكحلت عيني بدمعتي
ورمدن وما فاد وياهن طبيب
وخضرت بالروح وحشه
وشوكي نار مسعره وبيه لهيب
وصارت ايام العمر صعبه بغيابك
مثل مسجون وعليه واكف رقيب
انه ما ادري ولك شنهو الجرالك
وانه اسئلك ليش وانت ولا تجيب
مو مشينه اثنينه بدرب المحبه
والفرح ثالثنه هو وما يغيب
وطرنه بجناح الهوى جنه حمام
وكلنه ظن العاذل بحبنه يخيب
وكمنه نرسم للهوى احلى المعالم
وكلبي وي كلبك صفه ماي وحليب
وكبرت الدنيا وكبر بيهه خيالي
وجنت اتمنى العمر ما بيه مشيب
وجنت اتمنى اعيشن عمري كله
مكابلك لاجن خفت كلمة العيب
يل ملكت الروح كلهه
بشوفتك كل جرح بكليبي يطيب
انه خايف جنت منك
مثل خوف النعجه لو شافت الذيب
لان كلبي جان حاسس
خايف من سهام غدرك لو اله هي تصيب
ويا حسافه صدك ظني
موتت حبنه وتركته عل الصليب
روح ما تتهنه بعدي
خذه كلمه من رجل عاقل لبيب
واليعذب الناس يلكه
شما لكوا منه ترى ياخذ نصيب